Shugaban MTN Najeriya, Karl Toriola, ya bayyana cewa kamfanin sadarwa na MTN ya gabatar da bukatar karin kudin kira da data har kashi 100% ga Hukumar Sadarwa ta Najeriya (NCC).
Toriola ya bayyana wannan batu ne yayin wata hira da aka yi da shi a gidan talabijin na Arise TV a ranar Alhamis, inda ya ce bukatar ta samo asali ne daga matsalolin tattalin arziki da suka addabi kasar.
A cewarsa, “Mun gabatar da bukatar karin kashi 100% akan kudaden kira da data ga hukumar NCC. Amma gaskiya, banda yakinin cewa za su amince da wannan karin gaba daya saboda yanayin da halin tattalin arzikin kasar ke ciki.”
Ya kara da cewa wannan mataki yana da muhimmanci ga ci gaban ayyukan sadarwan MTN, amma duk da haka, ya tabbatar da cewa hukumar NCC na da hakkin yanke shawara a kan bukatar.
